أعمدة ومقالات

أنسانه . . أنتى أقوى / بقلم الدكتوره ” رحاب أبوبكر “

ليه الست دايما مستنيه حد يحط إيده على ظهرها ويسندها في الدنيا؟

مستنيه جوزها يقول برافو وتسلم إيدك وأنتِ أم تجنني, و بصراحة حقها بتتعب وتستاهل، بس لو ما قالهاش كده هيحصل ايه؟ المفروض تتكسر من جواها ؟

مستنيه من حبيبها يأخذ خطوة ويقول لها بحبك وعايز أتجوزك، علشان كفتاة مصرية في مجتمع شرقي تبدأ تعيش حياة جوا إطار طبيعي من وجهة نظر الناس، طيب لو ما أتجوزتش المفروض تموت؟

ليه الست بتكبر وبتربى وبتعلم والمفروض من عيالها يأخذوا بالهم منها لما تكبر؟ آه حقها بس برضه عندهم حياتهم، المفروض تعيش مستنياهم وبتلومهم طول الوقت وتتقهر؟

الست بتفضل تشتغل وتشتغل ويجي المدير يأخذ الشغل على الجاهز وتبقى مستنية كلمة برافو وشكرا وشاطرة. طيب لو عادي بتقبض مرتب أخر الشهر ومحدش مهتم بالتقدير المعنوي تعمل إيه؟ تستقيل؟

الست بتعيش حياتها تلم ورا جوزها مشاكله وتخبي على أمها وأمه وتعمل مبسوطة طول الوقت حتى لو في قلبها هتموت من الحسرة بس مش عايزه تصعب على حد ومحدش بيحس، طيب ايه تتطلق؟

الست من أقوى الكائنات اللي بتستحمل الألم النفسى والجسدى أكثر من الرجالة، لازم تبقى قوية مش مستنية حاجة من حد، لا جوز ولا عيال ولا مدير ولا ناس، أنتِ أقوى حبى نفسك ودلعيها، روحى الجيم وشوفى أصحابك وإشترى البلوزة اللي نفسك فيها وإصبغى شعرك اللون اللي حبتيه، وإعملى كل الحاجات اللي كنتِ بتحبيها زمان بس مبقاش ليها وقت، الحياة قصيرة متضعيش يوم واحد مستنية السعادة يقدمهالك الناس على طبق، إهتمى بنفسك وإتونسى مع الحد اللي جواكى، أنتِ أقوى وأعظم من الانتظار.

كل المحبة والحياة والخير بتتولد من جوا قلبك، كل الناس اللي بتيجى الدنيا بتتولد من جوا جسمك، وكل سعادة الدنيا بتتولد من جوا عقلك .. خليكى قوية ..خليكى سعيدة
لأنك أقوي وأعظم من الانتظار !

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى