صحافة المواطن

الصيف والصيد و الطعم

شعر - محمد مصطفى امين

فكرتينى بسمكه جميله
كنت صايدها
كنت ساعتها في ثانيه اعدادي
لابس شورت و جزمه كوتش
و كنت بحب الصيد و الطعم
و كنت بموت في اجازه الصيف علشان اجري و اطير على الريف
و اعمل سناره من البوص
وافحت في الارض و اجيب دود
و اقعد من النجمة على الترعه
اغني و اصفر و اشرب شاي
و اكل لقمه وجبنه قريش
كنت ساعتها في غايه المتعه
زي ما اكون في اللحظه دي هي
بس عشان ما انا كنت بروح
شكلي ملخبط متعاص طين
امي كانت بتزعقلي
و تهددني أننا هنسافر
كنت بعاند بس بخوف
و لاول مره بعد 23 شتاء
راجع احس بنفس الشيء
وانت معايا
لقيت الصيف والصيد والطعم
لقيت غنايا وشايي
وعيش من نفس الطعم
حسيت بالفرحه و بالخوف
حسيت بالتهديد من أمي الله يرحمها

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى