الفنمصر

عمر آدم في حوار خاص مع ” نور حجاج ” الموديل التي لها إستايل خاص بها ؛ ويتعلم منها الكثير من البنات ” لأنباء اليوم المصرية “

حوار - عمر آدم / إعداد -مني الجندي

عمر : في البداية عرفينا بنفسك ؟؟
نور : إسمي نور حجاج ، عندي 21 سنه بدرس في جامعه المنصورة كليه أداب قسم لغات شرقية ، تخصص تركي سنة رابعة ، اتولدت في مدينه أجا التابعه لمحافظة الدقهلية وحالياً عايشة في المنصورة .

عمر : مين هي نور حجاج ؟؟
نور : أنا إنسانه بسيطة جداً عايشه مع أصحابي بعشق الموضة ومتابعاها دايما واللبس و إزاي البس عموماً ؛ بحب يبقي ليا إستايل خاص بيا مش زي حد علشان كدا دايماً بيبان في صوري إن إستايلي مختلف عن أي حد وبكره التقليد أو إني أعمل حاجة زي حد دايماً عايشه بشعار ” Be yourself 🥀
Fashion says me too , style says only me .

عمر : بدايتك في المجال دا كانت إزاي ؟؟
نور : بدايتي كانت أول ما عملت إنستجرام تقريباً و أول ما بدأت أنزل صوري بعفويه جداً لقيت الناس بدأت تعملي فولو كتير ولايكس وبدأوا يعجبوا بصوري و إستايلي ويكلموني يعرفوا بجيب هدومي منين و إزاي بنسق إستايلي مع بعضه وفوتوغرافر كتير تطلب إنها تصورني ؛ بس مكنتش بوافق في الأول لأن معظمهم كان من بره المنصورة وأنا مش بحب أسافر كتير وبيدجات كتير كانت بتعملي شير وتنزل صوري .

عمر : نصيحتك للبنات اللي نفسهم يبقوا في مجال المودلينج ؟؟
نور : إن الإستايل أهم بكتير إنك تمشي علي الموضة بمراحل الإستايل إن يبقي ليكي إستايل خاص بيكي ومقتنعه بشكلك مهما ناس كرهتك فيه ومهما حد قالك إنتي وحشة رفيعة تخينة إنتي وشك وحش إنتي شعرك وحش !! كل واحد له حرية إختيار إستايله وشكله اللي مقتنع بيه ومش معني إنك تبقي إستايلش وعلي الموضة إنك تقلدي حد بالعكس إنتي ممكن تاخدي من حد وتزودي بنفسك وتحطي التاتش بتاعك التاتش دا بقي إسمه الإستايل خدي أفكار و إختيارات عن الموضو و إنتي بنفسك لازم تشَكلِيها علي هواكي .

عمر : الزمن لو يرجع بيكي لورا إي الحاجة اللي هتعمليها والي مش هتعمليها ؟؟
نور : هو أنا بصراحة مش بقتنع بالسؤال دا لأني بحب أعيش اليوم بيومه ومش بندم علي أي حاجة فاتت بالعكس كل حاجة كانت بتحصلي سواء حلوة أو وحشة لها تأثير كويس عليا وبتعلمني وتوعيني لقدام وبدأت أفهم الحياة أكتر و أستوعبها .

عمر : هل أهلك كانوا موافقين علي موضوع المودلينج دا ؟؟
نور : هما أهلي طبعاً عمرهم ما بيشوفوا إني بعمل حاجه وحشة وإحنا اتفقنا إني هشتغل في المجال دا بعد الجامعة يعني بعد ما أخلص دراستي لكن حالياً مش هينفع إني أشتغل حتي لما أي فوتوغرافر بيكلمني أنا بتصور عشان أنا حابه أتصور مش عشان شغل يعني وخداها هوايه حالياً وأهلي مش عندهم أي مشاكل من الموضوع دا عشان مش بيأثر علي دراستي خالص .

بنشكرك يا نور علي الحوار الجميل ده وربنا يوفقك وتحققي كل الي نفسك فيه يااارب ❤

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى