حوارات وتحقيقات

عمر آدم في حوار خاص مع ” هيام هشام ” المذيعة والموديل ، التي لها زوق خاااص في شغلها وتتمني التطلع الي الأفضل دائماً

حوار- عمر آدم/إعداد - إيناس صلاح

عمر : عرفينا عنك أكتر ؟؟ 
هيام : هيام هشام ، 23 سنة ، من المنيا حالياً عايشة في القاهرة، بسعى اني اوصل لحلمي واني اكون مذيعة شاطرة
، دراستي متعلقة بشغلي، خريجة أداب إعلام 2017 .

عمر : إيه اكتر موقف مؤثر في حياتك ؟؟ 
هيام : كان اول مرة امسك فيها مايك واقف علي استيدچ تقريباً مكنتش سامعة حد خالص غير صوت دقات قلبي والمرة دي كانت في الفيوم وكنت واقفة قدام ناس عمالقه في مجال الالقاء كان من اهمهم رئيس جامعة الفيوم دكتور “خالد عطاالله” كنت وقتها موجودة بمثل جامعه المنيا في ملتقى الجامعات المصريه وبعد عرضي لل presentation كان تعليق دكتور خالد انه هيبقي ليا مستقبل لاني كنت اصغر حد موجود ما بين الجامعات واني لازم اركز اكتر واكتر علشان اوصل لمكانتي الصحيحه و قال كمان اني عرضت كويس جدا يومها واخدت جائزه افضل محاضر علي مستوى الجامعات المصريه ومن ساعتها كانت دي من اكتر المواقف والنصايح والمؤثره عندي الي قدرت تشكل جزء مهم في ترتيب افكاري .

 

عمر : ايه الحاجة الي هتعمليها و مش هتعمليها لو رجع بيكِ الزمن ؟؟ 
هيام : الحاجه الي هعملها اني هفضل اتعلم مهما كبرت مش هكابر اني اتعلم من كل شخص او موقف عدى عليا حتي لو كان الي هتعمله 1% كل واحد جواه حاجة مختلف فانا هاخد الحاجة المختلفة دي، الحاجة الي مش هعملها اني مش هبطل اساعد الي محتاجني هفضل اساعدهم علشان ربنا يساعدني .

عمر : رد فعل اهلك ؟؟ 
هيام : ماما هي اول حد شجعني ومازالت هي طول الوقت في ضهري واني اتكلم عنها في جمله في خبر اكيد مش هيوفيها حقها بالمره هي الي كانت سبب في اني اسافر الفيوم واكيد طاقتها الايجابيه هي الي خلتني اخد اول محاضر علي مستوى الجامعات المصريه.. بابا كان جاي يعترض بس اهلي بعد ما شافوا الجوايز الي باخذها واني طول الوقت بتطلب في تقديم حفلات سواء كانت رسميه تحت رعاية الرئيس عبدالفتاح الفتاح السيسي وكمان حفلات الفنانين بقوا بيدعموني اكتر ودا كمان سبب اني اكون موجوده هنا في القاهره علشان اوصل لحلمي .

عمر : ردود افعال الناس ؟؟ 
هيام : الناس كان رد فعلها الأول غريب ازاي بنت وقادرة تحقق النجاح دا وخصوصاً اننا في المنيا يعني نطاق الشغل بيكون ضيق جدا بس انا كنت بعافر وافحت في الصخر علشان اعمل اسم .

عمر : شغلك ليه علاقة بدراستك ؟؟ 
هيام : لازم يكون له علاقة لانهم مكملين لبعض .

عمر : ايه هدفك الي عايزة توصليها ؟؟ 
هيام : الهدف والفكرة الي عايزه اوصلها للناس من خلال شغلي ان المنيا مش جلابية وبلاص المنيا فيها مواهب تستحق الدعم و التشجيع وان فيها مواهب من جميع المجالات محتاج يتسلط عليها الضوء وياريت نخرج برا فيلم الجزيرة و سلسال الدم علشان متخيلين اننا بصحي كل يوم نحلب الجاموسه دي حتي اسمها عروس الصعيد .

عمر : ايه خطواتك الجاية ؟؟ 
هيام : هيكون فيه تعاقدات مع مواقع الكترونية زي وشوشة ان شاء الله هتكون كمان فيه تصوير فيديوهات لاحداث الشارع وكمان هبدأ في تسجيل فويسات” كلمتين على الماشي ” بس بعد الانتهاء من الاعداد ولسه جاري تعديل الاسم بس دا الاسم الحالي الي تم الاستقرار عليه .

عمر : ايه نصيحتك لمتابعينك ؟؟ 
هيام : عايزه اقول ان الاعلام من اصعب المجالات الموجوده وهتقابل فيها ناس كتير محبطة وهتقابل واسطة وكوسة كتير فمتبطلش تعمل الي عليك وزيادة طول الوقت؛ عافر وقول انا هقدر ولو هما ليهم واسطة فأنت خلي واسطتك ربنا فأكيد هتوصل وافتكروا دايماً “انا عند حسن ظن عبدي بي” فبلاش تكونوا متشائمين .

عمر : اتكلمي اكتر عن حياتك ؟؟ 
هيام : انا بدأت من 1 كلية في مجال الميديا كنت باخد كورسات كتير في كل الجوانب بتاعته سواء كان اخراج، تصوير، اعداد علشان اكون فاهمة كويس كل حاجه كمان عملت دبلومة في الميديا في الجامعه الامريكيه معهد استانفورد بعدها بدأت اكتب في جرايد زي المنيا اليوم، وصوت المنيا، اخبار الجامعه، ومجلة حقوق الناس للاستاذة “هديات عبد النبي” + المواقع الالكترونيه زي منياوي، شاهد نت، منيا نيوز ومن خلالها اخذتها رصيف للاذاعة والتليفزيون كنت مراسلة لقناة الحدث و اوسكار اسبورت وبعدها النهار رياضة دوري ممتاز، دخلت مسابقات كتير تبع الجامعة وكنت باخد فيها مراكز زي اول مراسل تلفزيوني دا غير المبادرات التطوعيه الي كنت بمثل فيها الجامعه زي جامعه المنصوره مركز تاني علي مستوي الجامعات و شرم الشيخ في مبادره بكره اخدنا افضل مبادره وغيرها من المسابقات و كمان كنت من كاست تقديم اسبوع فتيات الجامعات تحت رعاية السيد الرئيس وكمان كنت من مقدمي ندوه الدكتور اللواء “اسامه الجمال” كنت من منظمي 3 ايام العيد لاسر الشهدا تحت رعايه السيد الرئيس بالتعاون مع وزاره الشباب والرياضة و قدمت حفلات كتير لفنانين وكمان اندرجراوند زي ادهم سليمان و احمد جمال و عمرو حسن و زاب ثروت والشاعر هشام الجخ و اسامه الهادي و اسفلت باند ومحمد ابراهيم وغيرهم ومكمله في تقديم الحفلات والمؤتمرات قدمت اكتر من 250 حفله تخرج كمان فاشون بلوجر وموديل وكان من اهم المشاركات شاركت في fashion Cairo festival دا طبعا اكبر تجمع لعارضي الازياء و مصمميه .

 

بنشكرك يا هيام على الحوار الجميل ده وربنا يوفقك وتحققي كل الي نفسك فيه يااارب 

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى