كاس المحبة بقلم : دكتور / رفيق عفيفي

يا ساكنة القلب من بدري

أنا مستنيكي من بدري

عاوز أشوف جمال بدري

كل ما واحدة بتعدي

و الاقي الخطوة بتهدي

أقول يا نفسي إتسدي

حبيبة قلبي دي هية

جميلة و حلوة و صبية

فكرها عالي و ذكية

أنا واقف في عز النار

غاب عني ضِلال الأشجار

حاسس إن عقلي طار

ما في نسمة عالكورنيش

لا مية و لا لقمة عيش

نِسَميه حب ولا الطيش

فين أيام ما كنت ليلي

جامدة و ب إيدين طايلة

تلطع محبوبها باللَيلة

تقعد ليلها بالبلكون

و هو تحت كالمجنون

أصله بحُسنها مفتون

مواعيد حبنا الأيام دي

يوم عندك و يوم عندي

و يرطن عربي و لاوندي

قريت الفاتحة مع أبوها

صاحبت أصحابها و اخوها

يا ريت المايلة عدلوها

انا ماشي برضا أمي

خفيف و مش تقيل دمي

فاهمني يا ولد عمي

أنا رفيع و كنت بدين

لاجل ما مخها بِيلين

شياكتي و الله زين الزين

يوماتي عليها برِن

لاجل ما قلبها يحن

و أخَدِتها ب مَحمل زَن

من أولها قصدي شريف

أصون ودي و ابقي عفيف

صافي النية و قلبي نضيف

شكلها نسيت ميعادي

يا خوفي تكسر فؤادي

أنا شكلي بالزعل بادي

يا قمر ليه غيابك طال

وللا احنا بس مش عالبال

يكونش مش عاجبك الحال

بعد صلاة الجِمعة وقفت

طالت وقفتي و قرفت

طول عمري و حظي زفت

عصير لمون روحت و جبت

علي نفسي شتمت و عِبت

وقعتي سودة.. ميعادنا السبت