”خالتي لبيبة” بقلم - رضا العزايزة

حديث لطيف بين أم احمد ودكتور رؤوف

فى بدايه الأمر كانت خالتى لبيبه تتجسس على إبنها وهو يذاكر فلسفه وعلم نفس

فسمعت كلام غريب وتطاير أقلام وصحف

ثم قالت : يالهوى الواد ماله قافل على نفسه وبيقول تعويذه ولا أية استر يارب الواد اتجنن ولا أتلبس

.. أم احمد ...خدت بعضها وجريت على الصيدليه تسأل الدكتور رؤوف على اللى سمعته من أبنها أحمد

وقالت للدكتور: عايزه علاج لأحمد إبنى يا دكتور

باين عليه أتجنن ولا أحسن اروح للشيخ عطوة

‏ قولى يا دكتور قولى أعمل أيه

‏الله ما يوقعك فى ضيقه يا أخويا

‏

‏رد الدكتور رؤوف : اهدى يا أم احمد قولى سمعتى أيه الأول

‏

‏ردت أم احمد : سمعت الواد متعصب وبيقول

‏ النرجسى المتعفن السام والصمت العقابى وكلمه تانيه أستنى نسيت يا دكتور اللهم ذكرنى ما نسيت ‏اللهم صلى على النبى

‏ اه افتكرت الإسقاط اه الإسقاط

‏هو يا أخويا متخانق مع المدرس وعايز يسقطه ولا إيه

‏

‏الدكتور: اهدى ياأم احمد بصى واحده واحده

‏النرجسى ده حد منفوش على الفاضى مؤذى ومريض نفسيا وشايف نفسه صح على طول

‏والعلاقه معاه سامه يعنى شخص متعب ومقرف والبعد عنه غنيمه أبعد عن النرجسى وادعيله ربنا يهديه لنفسه

‏أم احمد: يا حوستى يا دكتور فى حد على كده قاهر الواد مخليه يكلم نفسه وعامل ديك رومى على الواد احمد الغلبان

طيب ‏ ‏والصمت العقابى والإسقاط دا أيه يا أخويا ‏

ليكون بت يعرفها مش عايزة تكلمه علشان الواد يزعل ويسقط وينقهر استرها يارب

‏

‏الدكتور: لا يا أم احمد الصمت العقابى ده بيعمله الشخص النرجسى المنفوش على الفاضى علشان يخلى الضحيه يتأذى ويتألم بعد متعلق بيه

‏

‏أم احمد : شفت كلامى صح البت علقته وبعد كده سابته منها لله البعيدة

‏

‏الدكتور : هو بيذاكر يا أم احمد متخفيش عليه

‏

‏أم احمد : ألا ليه يا اخويا بيعلموا العيال حاجه تقهر كده

‏

‏الدكتور : علشان يعرف يتعامل مع الناس المريضه نفسياً

‏

‏أم احمد: عندك حق يا دكتور إلا ماحد خالى من المرض

‏

‏الدكتور : أما الإسقاط ده يعنى أنت تعمل الغلط وتنكد وتقلب الطربيزة علي اللى قدامك وتقول أنه السبب علشان تحس الضحيه بالذنب على طول ويتعب نفسياً

‏

‏أم احمد : سترك يارب من النرجسى ده يعنى اللى فيه يجيبه فيه شوف يا أخويا الخبث يكفينا شر النرجسى

‏بقولك أيه يا دكتور مفيش بورشام للنرجسى ده يا أخويا

‏

‏الدكتور : فى يا أم احمد أنك تسيبى النرجسى خالص يضرب دماغه فى الحيط وتبعدى عنه

‏

‏أم احمد : والمرسى ابو العباس يا دكتور لما تقابل احمد إبنى قوله عن النرجسى ده لحسن الواد مقهور الهى ما يوقع فى نرجسى يا أخويا