طول الوقت بنمر بتجارب بنتعلم منها وبتعلم فينا. تجربة بترسم بسمة، والتانية بتسيب جرح. بس يا تري أيه اللي بيخلينا نتعلم البسمة ولا الجرح؟! أكيد كل لحظة وليها ذكري وكل ذكري وليها جملة مفيدة أتحفرت جوانا. تجارب بتكسرنا، وتجارب بتقوينا. بس الأهم أننا مانخفش من اللي جاي. أتعلموا الجرأة في التعامل. بلاش الخوف يسيطر على مناطق واسعة النطاق جواكم. بلاش تحددوا أقامة روحكم جوه جسدكم. أمنحوا نفسكم حق الأعتراض أو الموافقة. صرحوا نفسكم بضعفها وقوتها. أعترضوا علي كل شئ بيضايقكم.... قولوا لا. أتعلموا تحبوا نفسكم وأسعوا لرضاها. بصوا في المراية وأتعرفوا من أول وجديد علي ملامحكم. حسوها وحبوها. أرتقوا بالتعامل معاها. أتعلموا تسمعوا كل صوت بيقول لا جواكم. وأعرفوا سبب الأعتراض وحاولوا تصلحوه. ماتجوش علي نفسكم. ماتعملوش حاجة مش راضيين عنها. بلاش نضغط علي أعصابنا في حين أننا من نتعامل بهدوء. أصل كل مشكلة وليها حل. وكل داء وليه دواء.
علي فكرة بعد طول الليل بيطلع النهار. ومن جوف الأحزان بيتولد الفرح. أهم حاجة تكونوا راضيين من جواكم حابين نفسكم. أتصلحوا مع كل وجع علم جواكم وغيروه لفرح يسكن مداكم.