امسك حرامي

الشاعر- اشرف عبد الكريم

ياعم اقفل على بابك

وانسى الدنيا ومافيها

ولم الشعر في دولابك

وارحل من بلاويها ..

وإيه هيتكتب تاني

مفيش ولا حاجة تستاهل

ده حتى الشعر في زماني

بقى شغلانة الجاهل ..

بيحضر كل يوم ندوات

هوايته سرقة الأبيات

وفجأة تشوفه ع الشاشات

يقول في كلام ماهوش حاصل ..

ويلبس م الهدوم الوان

ويتمايع كما النسوان

وعايش وسط أهل الكار

وبيت على بيت بيبنى ديوان ..

ويطلع ع المنصة يقول

ويقرا في كلام منقول

ويمدح في الحلازونة

كتبهاله شاعر مجهول ..

ويوم ورا يوم بيبقى تمام

واسمه في الوسط بيبان

وتسأل عنه يطلع مين

يقولوا ده شاعر الفرسان ..

واضحك انت على خيبتك

عامل شاعر ودي مصيبتك

مبتسجلش أعمالك

وجه صاحبنا سرق سيرتك ..

ولف الكون بأعمالك

ومحا اسمك وألقابك

نصيحة وخدها من كتكوت

كفاية ولم أشعارك ..