عارفة عبدالرسول لأنباء اليوم: نفسي أعمل فيلم استعراضي وأقدم أدوار ”راقصة وتابت، مجنونة، مدمنة” (خاص)

ولِدت في منطقة الحضرة بالإسكندرية، بدأت موهبتها (الحكاءة) منذ الطفولة وهي تقص على عائلتها يومياتها في دكان والدها، وقدمت العديد من الجولات الفنية في ربوع مصر، وانتقلت إلى القاهرة في عمر 52 عام لتكتب سطور رحلة فنية جديدة تضاف إلى رصيدها الفني، قدمت فيها أكثر من 75 عمل تلفزيوني وما زال العطاء مستمر ..

حوارنا اليوم مع الفنانة القديرة "عارفة عبدالرسول"

(الجزء الثاني)

(8) أول أعمال لحضرتك على شاشة التلفزيون كان (مسلسل أبواب الخوف) ثم برنامج (البلاتوه )مع أحمد أمين احكيلنا شعورك وقتها؟

- كان في فترة بين العملين قدمت فيهم أعمال عرَّفت الناس بيا شوية زي (البيوت أسرار، وكلنها والعة ، الميزان....) ثم " البلاتوه" ,والتجربتين "أبواب الخوف" و" البلاتوه" من النقيض للنقيض، عرفو الجمهور عليا أكثر، وإني في منطقة مختلفة ممكن أعمل أي دور، مش هابقى مقتصرة على دور الأم اللي بتقول "إشرب اللبن يابني، ودفي صدرك ونام...) لأ الأعمال دي علمت مع الناس.

وطبعاً شغلي مع أحمد أمين وفي "أبواب الخوف" كان من أمتع الأعمال اللي عملتها في حياتي "أبواب الخوف" كان في البداية خالص وكنت فرحانة أوي إن المخرج "أحمد خالد" رشحني من "سي دي" وصلتله فيها 50 صورة لستات في سني، وكان عايز واحدة تعمل دور عرافة هاتقول جملتين، وشاف صورتي وقال عايز الممثلة دي، و قعد معايا وبعدها قالي إنت هتاخدي بطولة الحلقة، وهو أول واحد إداني فرصة كبيرة وأنا بعتز بيه جداً وبالعمل دا للنهاردة.

أما بالنسبة ل "أحمد أمين"، فلما دخلت معاه وشفت أفكاره وطريقته في تقديم الكوميديا اللذيذة اللي بتدخل كل بيت، كنت ببقى طايرة من الفرح، وكنا بنقعد أنا وهو أوقات كتيرة نفكر مع بعض ونتشارك هانعمل إيه خلال الحلقة.

(9) أمتعتينا بأنماط مختلفة من الأم المصرية، أيهم الأقرب لقلب عارفة عبد الرسول؟

- أنا عملت شخصيات لأمهات كثير، وكل شخصية أنا بحبها لأني كنت بدور على مفتاح جديد وأنا بقدمها، مش عايزة أعمل الأمهات كلها شبه بعض، فمثلاً عملت الأم في مسلسل "الميزان" كانت عجباني أوي وفرحانة بنفسي خالص، وفي مسلسل "موسى" أم "محمد رمضان " دي كانت شخصية أم مريضة طول المسلسل بتتمثل وهي نايمة على ظهرها، حبيت دوري في "لا تطفئ الشمس"

الحمد لله حبيت كل أدواري، ومفيش شخصية لأم قدمتها ندمت إني عملتها.

(10) حضرتك دايماً بتقولي لسه عندي أكتر، إيه الدور اللي نفسك تقدميه؟

- أنا نفسى أقدم أدوار كتير غير نمطية، مش عشان أنا كبيرة فى السن يبقى الدور الدائم هو الأم، يعنى مثلاً ممكن يبقى دور اتنين ستات عواجيز طلعنا رحلة وحصلت معنا مشاكل ويبقى الفيلم بطولتنا، مثلاً فيلم إستعراضي زي فيلم"ماميا" ل "ميريل ستريب" ، مثلاً دور راقصة وتابت ،أحب أعمل دور (مدمنة، مجنونة...) أحب الأدوار المركبة

(11) أ عارفة حضرتك عاشقة للمغامرة وطول الوقت بتجربي حاجة جديدة، تقولي إيه للشباب اللي بيقول خلاص عدى الوقت؟

- الشباب للأسف مش صبور، الشاب بيبقى متخرج وفي دماغه مليون حاجة، عايز يدخل الجيش ويبقى ممثل ويتجوز، وعايز يعمل كل الحاجات في وقت واحد وكلها تتعمل كويس وسنة مثلاً يبقى مخلص كل حاجة.

طبعاً أنت لو اخترت مهنة التمثيل هي مهنة صعبة ومش أي حد يقدر عليها، والنهاردة ممكن تعمل دور فى مسلسل عقبال ما يجي دور تاني كويس ممكن يفوت سنتين ثلاثة، فالموضوع تراكمي، مش المتوقع إنك تظهر على التليفزيون النهاردة الناس هايغمى عليها وتقول يا سلام شفتوا اللي ظهر دا.

لا إنت بتكَون إسم وتاريخ، النهاردة تعمل مشهد بكرة يبقى مشهدين بعده تاخد دور، الحكاية عايزة صبر شديد ومعافرة، ولولو حد عنده مسؤوليات وبيت وأسره لازم وهو بيسعى في طريقة يكون في الأساس عنده شغل ومصدر دخل بيصرف منه لحد ما الناس تعرفه.

(12) ممكن نعرف أعمالك القادمة؟

- أنا حالياً في لبنان بصور مسلسل سيب وأنا أسيب بطولة (هنا الزاهد) و (أحمد السعدني) إخراج (وائل إحسان)، والمسلسل هايعبجكم جداً، ومبسوطة بالعمل دا، والحقيقة (وائل إحسان) هو أكبر مكسب حصلي في حياتي كلها.

أ عارفة إتشرفنا بحوارنا مع حضرتك، وفي انتظار المزيد من الأعمال المبدعة.