حوار خاص مع ” رانيا السيد ” الفنانه والرسامة الجميله التي دائما تسعى لإبتكار وإبداع كل ما هو مختلف في الفن

س : في البدايه عرفينا بنفسك؟؟

ج : اسمي رانيا السيد
سني 20 سنه بدرس social work وفنون جميله قسم تصوير زيتي " دراسات حره " اتولدت بره مصر عايشه في القاهره عشان دراستي .

س : احكيلنا اكتر عن حياتك؟؟

ج : حياتي عباره عن كذا حاجه منهم دراستي وان اخلص منها وهدفي لمشروع اللي بسعة ليه انه يتنفذ جزء جزء وبدأت فيه فعلا بأول خطوه ودي حاجه أدتني حماس أن أكمل فيه بعد ما لقيت ناس كتير فرحت اني أخدت فيه .

س : احكيلنا بدأتي في مجال الفن وشغلك إزاي؟؟

ج : اول ما بدأت في مجال الفن كان زي أي حد لسه بيكتشف حاجات جديده حواليه في حاجات كنت اعرفها وحاجات لاء بعد ما دخلت فنون بدأت اتعلم حاجات اكتر واكتر وأشارك في معارض وأتعرف على ناس في المجال ده كل يوم وناس أكبر مني وليهم خبره بعدها بدأت أرسم على حاجات مختلفه ومنها لبسي زي كوتشيات بتاعتي والتيشيرتات وأجدد فيها وأخليها مميزه بعد فترة بدأت ناس حبت الموضوع ومقبلين عليه بعدها بفتره بقيت أشتغل على خشب وبدأت أرسم على جدران وبعد فتره بدأت ناس تكلمني على رسم التيشيرتات وبدأت فكرة مشروعي منها وده جزء بسيط من هدف مشروعي لأن هدفي الأساسي إني أءسس شركة ديزاين بس هتكون مختلفه في كذا حاجه عن أي شركه وبعدها بفتره فكرت ليه مبدأش بجزء صغير دلوقتي ومع الوقت هيكبر زي أي حد بدأ مشروع في حياته طبعا في الأول الموضوع كان صعب بسبب الماديات وبسبب إن الخامات بتغلى كل وقت والتاني وبدأت احوش جزء بسيط من مصروفي لحد ما جمعت مبلغ بسيط قدرت اشتري جزء من الخامات وبدأت افكر في اسم ل Store و سميته Mickey وبسبب اختياري للأسم ده أن شخصيه ديزني بحبها وإن اصحابي دايما بيقولولي يا ميكي فا قولت ليه الإسم ميكونش حاجه واخده من شخصيتي ومن هنا بدأت اشتغل اكتر نزلت اوبن داي بشغلي وكانت أول تجربه ليا في حاجه زي كده بس طبعا في صعوبات كانت بتواجهني بس بقدر اتغلب عليها ساعات وساعات بس برغم كل ده أن في ناس كتير جميله بتقدر الفن وخصوصا شغل الهاند ميد وده حافز ليا مخليني مكمله لحد دلوقتي خصوصا أن دي كمان حاجه انا بحبها .

س : هل اهلك اعترضوا انك تدخلي المجال ده؟؟

ج : اهلي محدش منهم اعترض لما دخلت مجال الفن بالعكس كان في تشجيع خصوصا من مانا كانت دايما تحمسني اي معارض كنت اشترك فيها كانت دايما واقفه جنبي اما بابا مؤخرا بدأ يدعمني شويه .

س : ايه اكتر موقف أثر فيكي على مدار حياتك؟؟

ج : اكتر موقف أثر فيا هي أيام فتره الثانويه العامه حصلي موقف بسببها انا مبحبش احكي عنه بس بسبب السنه دي اتصدمت في ناس كتير لدرجه وصلتني لعدم الثقه في أي حد ..

س : اي ردود أفعال أهلك والناس على شغلك؟؟

ج : ردود أفعال أهلي طبيعي اللي هو ربنا يوفقك وتقدري تكملي في اللي نفسك فيه.
ردود أفعال الناس في منها إيجابي وفي سلبي وده طبيعي لأي حد في ناس متقبله فكرة الفن وفي ناس شايفه انه تضييع وقت وحاجه ملهاش لازمه ودول ملناش دعوه بيهم.

س : لو الزمن رجع بيكي لورا ايه الحاجه اللي مش هتعمليه؟؟

ج : الزمن لو رجع بيا لورا الحاجه اللي مكنتش هعملها اني مكنتش هرجع مصر .

س : اي الهدف أو الفكره اللي حابه توصليها يشغلك وفنك؟؟

ج : الهدف أو الفكره اللي حابه أوصلها هي أن مادام عندي عقل بيفكر وشغال ليه مشغلش الحاجه اللي قدامي وأحولها لشكل جمالي فيه لمسه فنيه خصوصا لما بتكون الحاجه شغل هاند ميد ومعموله بمزاج وأنها حاجه انا بحبها فا هيكون فيها إبداع .

س : في النهايه اي النصيحه اللي حابه تقوليها للبنات اللي نفسها تشتغل في مجال الفن؟؟

ج : نصيحه للبنات اللي حابه تشتغل اقولهم متترددوش في انكم تاخدوا خطوه زي دي حتى لو شايفين انكم صغيرين محدش بيبدأ ولا يطلع السلم كله مره واحده ولازم تجربوا منها هتقدروا تعتمدوا على نفسكوا في حاجات كتير وهتكونوا علاقات مع ناس كتير هيكون ليها خبره في الحياه وأنها ازاي تتعامل بعد كده لما و لما تلاقي هدفك اللي كان نفسك فيه بيتجقق خطوه خطوه هتكوني فخورة بنفسك .

بنشكرك يا رانيا على الحوار الجميل و الممتع ده و دايما تحققي اللي نفسك فيه وتنجحي اكتر واكتر أن شاء الله. ?