حوار خاص مع ` أمل نادر عبدالرحمن ` التي ترسم الضحكة علي وجوه من يشاهدون فيديوهاتها الرائعة ، التي يشبهونها بالممثلة ” جميلة عوض ”

س : عرفينا بنفسك؟؟
ج : امل نادر عبدالرحمن 17 سنه اتولدت في المحلة الكبرى في محافظة الغربية وعايشة فيها .

س : أحكيلنا أكتر عن حياتك؟؟
ج : حياتي عادية جدا زي أي حد عبارة عن دراسة و أصحاب عادي جدا أه جاتلي فترة كانت كل حاجة إتدمرت صحاب و دراسة و نفسيا و كله بس الحمدلله أنا قوية جدا و مبحبش أكون ضعيفة إتخطيت كل ده بسهولة جدا بفضل ربنا و إني قربت منه الحمدلله و بدأت من الأول و بدأت واحدة واحدة أحقق كل اللي نفسي فيه الحمدلله .

س : بدأتي الموضوع أزاي؟؟
ج : أنا بدأت كتسلية و الموضوع بقى جد و ناس حبتني و قالت كملي ف هي مامتي إعترضت بس و قالتلي هتسمعي نقد رخم ممكن يضايقك بس كان نقاش مش إجبار بس أنا ببص للإيجابي و حبيت أكمل .

س : أحكيلنا قصة حياتك من أول ما بدأتي لحد اللحظه دي؟؟
ج : بالنسبة لقصة حياتي أنا بدأت و أنا تقريبا كان كله متدمر و كنت بتصور عادي و الأبليكيشن عندي ف إتصورت و نزلت و الناس قالت حلو و الله كملي و صورت مع صاحبتي كل ده بهزار و مفيش في دماغي أي حاجة من اللي أنا فيها حاليا و بعدين كنت بنزل إنستا و واتس و مش مهتمية بصراحة ب Tik Tok و أنا كان عندي أصلا 2000 فا كان فيه شوية ناس فالتشجيع كان أكتر و بدأ يكتر صحابي مفيش حد منهم وقف جنبي إطلاقا و كانوا باصين أيه ده هتوصلي من ده بإيه زيها زينا بتعمل فيديوهات للتسلية و بعدين وصلت الحمدلله واحدة واحدة و جيت فترة وقفت حوالي شهرين بسبب مشاكل كتير مقدرتش أكمل و كنت زهقت و مش بيعجبني أي فيديو بعمله و بعديها رجعت تاني و لقيت ناس كانت واخدة بالها من غيابي فعلا و إيه مختفيه فين و حسيت بإهتمام لطيف بدأت أزيد أكتر و أكتر و الفيديوهات أتحسنت كتير و أنا حتى ببص على الفيديوهات شايفه تطور كويس جدا و ناس بتحبني فعلا و بتحترمني بس شجعني ناس قليلة جدا و كان أوقات بيكون تقضية واجب و ميعرفوش أني هوصل بكده بس الحمدلله يعني و بدأ الكل يقرب مني بطريقة رهيبة و أحنا كنا متأكدين أنك هتوصلي و مفيش حد فيهم كان جنبي إطلاقا بس شكرا جدا للناس اللي كانت جنبي و شجعتني الفترة دي خلتني أعرف أفرق و إدتني شخصية و عقل أكبر بكتير الحمدلله مواقفي الكتير اللي دايما متعبة علمتني كتير و مفيش حد من أخواتي شجعني بس في صحابي و في Followers اللي هما عيلتي دلوقتي و بحبهم جدا و الحمدلله وصلت و مكملة و من أحسن الناس في حياتي خالي اللي بحبه جدا و شايفة أنه من أكتر الناس اللي سألت و وقفت جنبي و فخورة أني عندي خال زي ده ربنا يديمه في حياتي و إن شاء الله أحقق كل اللي بتمناه الحمدلله أنا شخصية اللي دايما بتضحك في أصعب المواقف و تهزر و كأن مفيش حاجة بتكمل الحياة عادي جدا فا ربنا بيدي كل واحد و هو عارف قدرة تحمله و الحمدلله أتعلمت حاجات كتير جدا من الوقت ده .

س : أيه أكتر موقف أثر عليكي في حياتك؟؟
ج : موقف مؤثر دي صعبة لأن أنا مواقفي كتير و الحمدلله كلها بخليها درس ليا و أتعلم منه فا مقدرش أختار حاجة معينة .

أيه ردود أفعال الناس و ردود أفعال أهلك على فيديوهاتك؟؟
س : ردود أفعال الناس كانت إيجابية جدا جدا الحمدلله غير ما أتوقع جدا يعني لما بدأت أتشهر طبعا بدأوا يظهروا الناس الفظيعة اللي أي حاجة تقول وحش بس مع ذلك ميفرقوش معايا الإيجابي كان أكتر بكتير.
و ردود أفعال أهلي كانوا بيتفرجوا و يسكتوا و بعدين في منهم بيحط الفيديوهات و يضحك و الحمدلله يعني .

س : أيه الحاجة اللي ناوية تعمليها و أيه الحاجة اللي مش هتعمليها ؟؟
ج : الحاجة اللي هعملها أني أركز في الدراسة كويس جدا و أدخل كلية إعلام إن شاء الله و منها أبدأ أدخل المجال و أنا مرتاحة و أنا حاطه خطة a و b .
الحاجة اللي مش هعملها أني أدخل في أي حاجة و خلاص لاء هختار المحتوى الكويس مش أي محتوى و خلاص بهدف الشهرة يعني من الآخر هبعد عن المحتوى السئ و المجال كله لو ضد الصح .

س : أيه الهدف أو الفكره اللي عايزه توصليها من المجال ده؟؟
ج : الهدف أني بعمل حاجة بحبها و مستمتعه بيها و ناس بتحبني مفيش أحسن من كده الحمدلله.
الفكره عايزه أوصل أن Tik Tok أبليكيشن لطيف وبيساعد جدا لأن مش أي حد عنده واسطة يدخل بيها المجال و الفرص بقت قليلة جدا مش لأي حد لكن Tik Tok وفر ده كلنا بنتخيل أن أحنا ممثلين و نقلد مشهد عارفينوا و نقول ياريتنا أحنا ف Tik Tok وفر الحلم ده الأبليكيشن المصريين مش عاملين ليه قيمة إطلاقا بالرغم في بلاد تانية عاملين قيمته و حقه جدا و مقدراه و ده حقه و عايزه أوصل حاجه نضيفة و تمثيل مش لفا نظر بطرق مش لطيفة زي كتير من الناس و تجميع Followers و شهرة و خلاص لاء ده حاجة بحبها مش كلهم طبعا .

س : أيه هي خطواتك الجايه؟؟
ج : خطواتي أني بفكر أكبر الموضوع و أعمل قناة على اليوتيوب بس إن شاء الله لما أنظم الدراسة أهم حاجة و بعدين بس السنتين اللي جايين دول سعدوا و هبدأ أعمل كل جهدي أني أدخل في مجال التمثيل إن شاء الله و أنا بسهل طريقي بس مش أكتر بحيث أني لما أقرر يكون أسهل شوية و مجيش على الدراسة .

س : في النهاية أيه النصيحة اللي تحبي تقوليها لكل بنت نفسها تدخل المجال ده؟؟
ج : نصيحة لكل بنت أنها لو عندها الموهبة دي تطلع تقدمها بجد و هي طالعة تظهر موهبة و تضحك ناس مش بغرض الشهرة و Followers و خلاص و مش بلفت النظر لاء بالموهبة عشان متسمعش حاجة تضايقها و عشان ده للموهبة مش للطريقة الغلط اللي للأسف الكتير بيستخدموه بيه .

بنشكرك جدا يا أمل على الحوار الجميل ده و من نجاح لنجاح دايما يارب أن شاء الله ♥?