حوار خاص مع ” أميرة مجدي” الجميلة و الفيديو بلووجر و إعلامية المستقبل و التي تلقب ب ” ملكة الإرادة” .

عرفينا بنفسك؟؟
أميرة مجدي كامل أحمد المغربي، 23 سنة، متخرجة من كلية الإعلام إذاعة و تليفزيون، أتولدت في المعادي و عايشة في 6 أكتوبر .

أحكيلنا أكتر عن حياتك؟؟
 كنت زمان بقطع في الكلام بس لما دخلت إعلام حاولت أقاوم ده و أدرب نفسي لحد ما أتخلصت من المشكلة دي .

أيه هي قصة حياتك؟؟
 أنا أتخرجت من إذاعة و تليفزيون. واحدة زيي في الكلية دي و عندها مشكلة في الكلام أكيد هتبقى حاجة صعبة بس أنا دخلت التحدي و فضلت أمرن نفسي و أشتركت في مسابقات عشان أحط نفسي قدام مواجهة الأمر الواقع و بالفعل قدمت في مسابقة ` ملكة العرب ` و كسبت Top 5 و أتلقبت ب " ملكة الإرادة " و شاركت في مسابقة طبخ مع الشيف ` علاء الشربيني ` و كسبت مركز أول في مشروع التخرج مريت بأذمة كبيرة أثرت على حياتي و أتعالجت بسببها نفسيا فترة بس أستجمعت طاقتي تاني و ركزت في دراستي و حاولت مخليش حاجة تأثر على دراستي و مستقبلي مهما كانت و الحمدلله مشروعي أخذ مركز أول و عملاله أغنية أسمها " عروسة آدم " على أسم مشروع تخرجي بعد تخرجي أبتديت أعمل فيديوهات كوميدي و فيديوهات بتكلم فيها و فيديوهات دبلچه كنت بحاول أدرب نفسي و أعرف نفسي أنا في أنهي أتجاه لحد ما أشتغلت و أتدربت في كذا جريدة و قناة لحد ما وصلت حاليا أني أشتغل مذيعة في موقع مبتدأ الخاص بقناة Dmc و بإذن الله هيكون في حاجات تانية قريب .

 هل أهلك كانوا موافقين على شغلك؟؟
 أهلي موافقين و ماما بتشجعني .

 أيه أكتر موقف أثر عليكي في حياتك؟؟
 كنت صغيرة و المدرس كان وقفني أقرأ فكنت بقرأ و بقطع في الكلام كتير راح مهزئني و ضحك عليا و طردني بره الفصل و زمايلي كلهم بقوا يتلموا عليا في البريك و يضربوني و يتريقوا عليا لحد ما بقتي أعرف أتكلم تماما إلا كام كلمة و أتكلم كويس بيني و بين نفسي تقريبا دي أكتر فترة كرهتها و أثرت فيا .

 لو الزمن رجع بيكي أيه الحاجه اللي كنتي هتغيريها في حياتك؟؟
مكنتش هغير حاجة سواء حلوة أو وحشة لأن ده علمني كتير حاليا و غير فيا كتير .

أيه الهدف اللي عايزة توصليله من خلال شغلك؟؟
 الهدف أني أعمل برنامج فكرته جديدة و هادفة في نفس الوقت تكون متعملتش في الوطن العربي قبل كده .

أيه هي خطواتك الجاية في حياتك؟؟
 أني بطور نفسي بحيث أكون قادرة أعمل حاجة T.v بإحترافية غير شغلي على السوشيال ميديا .

 أيه النصيحة اللي حابه تقوليها للبنات اللي نفسها تدخل المجال ده؟؟
 نصيحتي لأي بنت عايزة تشتغل في المجال ده أقولها تطور من نفسها و تسعى و متستناش الفرصة هي تعمل فرصتها بنفسها و تعمل الحاجة اللي بتحبها و تعمل شغلها الخاص بيها سواء دبلچه أو إلقاء أو أذاعة تعمل فيديوهات متفضلش واقفة مكانها .

بنشكرك جدا على الحوار الجميل ده و أن شاء الله تحققي اللي نفسك فيه و دايما ف تقدم و نجاح أن شاء الله ??