حوار خاص مع ” هايدي علي ” ملكة جمال الدلتا لعام ٢٠١٨ ؛ والتي دائماً تتطلع أن تصبح ” إعلامية ” ناجحة ولها دور مؤثر في المجتمع

س : في البداية عرفينا بنفسك ؟؟

ج : هايدى على ، إتولدت وعايشة في المنصورة ، عندي ٣٠ سنة ، حاصلة على بكالوريوس تجارة
، حاصلة علي لقب ملكة جمال الدلتا لعام ٢٠١٨ .

س : ما أكثر موقف مؤثر في حياتك ؟؟ 
ج : وفاه أغلى إنسان علي قلبى ؛ فقدت أعظم راجل في حياتي أبي رحمه الله عليه .

س : هل أهلك كانو موافقون أن تدخلي هذا المجال ؟؟ 
ج : أمى كانت أكتر حد support ليا وطول عمرها أى مجال أو شغل هى معايا دايماً و بتدعمنى هى أيقونة نجاحى .

س : لو الزمن رجع بيكي للخلف ما الشئ التي تريدي أن تفعليه وما الشئ التي لا تريدي أن تفعليه ؟؟ 
ج : اللى هعمله كنت هقضى كل دقيقة مع أبى و أقعد تحت رجله العمر كله رحمه الله عليه ، واللى مكنتش هعمله إنى عرفت ناس ووثقت فيهم وضيعت معاهم مجهود وطاقة يمكن يكونوا إستنزفونى وعرقلونى فى مسيرة نجاحي ولكن بالطبع إستفدت كتير وكانوا دفعة عظيمة فى حياتى .

س : ما ردود أفعال الناس وأهلك علي شغلك ؟؟ 
ج : أكيد بقابل نوع مؤيد وحابب شغلى و إيجابى بفرح بكلامهم وبيكون دفعه حلوة ليا وأكيد نوع ناقد بتقبله وبالعكس بيبنى شخصيتى جداً النوع ده ؛ فى الأول كنت بتهز شوية من النقد الفعال بس بعد وقت بتحسي قد إيه ممتع وفعلاً بيخليكى طول الوقت بتشتغلى علي نفسك علشان تطلعى بالصورة كما يجب .

س : ما الهدف التي تريدي أن تُعلميه للناس من خلال مجالك ؟؟ 
ج : أهداف كتيرة ؛ إن كل بنت تطلع بره الصندوق وتشتغل علي نفسها كل بنت جواها حاجه حلوة تكتشفها وتوظفها صح ، هدفى التانى إنى كملكة جمال الدلتا وصلتلهم صوت وصورة إن جمال الروح أحلى بكتير من الشكل وقد إيه الإنسان أما بيكون عنده تصالح نفسي بيطلع علي وشه وتقدر كل بنت تبقى أجمل ملكة جمال بروحها وطبيعتها وتصالحها مع نفسها وإنها تقدر توزع طاقة إيجابية وتفاؤل علي كل اللى حواليها ؛ كلنا عندنا مشاكل بس إيمانا ورضانا بإن ربنا موجود وبايده كل حاجة وبنطلب منه كل أمانينا حتى لو إتظلمتى فهو مطلع كلميه و هيرد عليكى فى إجابتو لدعائك .

س : ما خطواتك الفترة القادمة ؟؟ 
ج : إنشاء الله أكون مذيعة شاطرة بمجهودى وموهبتى وتوفيق ربنا ، و أطور البزنس بتاعى فى بلدى ويكون مكان لكل بنت عاوزاه تحافظ علي جمالها وتستعيد نفسها اللى ضاعت من جوه ؛ مش بقدم خدمه تجارية فقط لا أنا بدعم كل الناس من قلبى زى لما بييجي عليا وقت وهما دعمونى نفسياً ؛ ومادياً بتعاملهم مع البزنس الخاص بيا ، ولما بقيت ملكه جمال الدلتا شفت الفرحه فى عينهم ؛ و بوجه ليهم رساله أنا بيكم ومعاكم وأنتو سبب فرحتى .

س : نصيحة تُقديميها لكل شخص نفسه يَبدأ في نفس مجالك ؟؟ 
ج : كن أنت قدم حاجة من جواك تكون حاسسها بتعبر عنك بلاش تنجرف فى التيار وخلاص أعمل حاجة بعد ١٠ سنين لما تشوفها و أنت بعيد تفتخر بيها وتقول أنا فعلا كنت مميز ؛ بلاش تنافق وتعمل حاجة مش عجباك صدقنى بتطلع مش حلوة ولو طلعت معقولة بتكون ملهاش أثر .

س : ما المعوقات التي واجهتك في بدايتك ؟؟ 
ج : أصحاب النفوس الغير سويه للأسف بس قررت أتخطى لأنهم عقبة فقط .

س : من أكثر شخص وقف بجانبك ، وماذا تريدي أن تقولي له ؟؟ 
ج : بوجه شكر خاص لأحلى حاجة فى عمرى وهي أمى وبقولها طول ما أنتى موجودة مخسرتش حاجة فى الدنيا ربنا يخليكى ليا ، و أحب أشكر كل حد وقف جنبى و ربنا يقدرنى وأقدر أرد فضلكم عليا و أدعمكم و أجبر خاطرك زى ماجبرتم خاطرى وكنتم جنبي في أصعب أوقات حياتي .

س : كلميني أكثر عن بدايتك ؟؟ 
ج : حكايتى من أول مابدات المجال اشتغلت علي نفسي وبدرب ، قدمت حفلات كمذيعة و إشتغلت بحضور نجوم فى الوسط الفنى والوسط الإجتماعى و إنشاء الله مكمله لتحقيق حلمى وهعافر لحد ما أوصل للى بتمناه .

س : كلمة توجهيها لمتابعينك ؟؟ 
ج : أنا بيكم مكمله لتحقيث حلمى بأخد منكم طاقتى الإيجابية ولما بتعب بقف تانى وبستمر علشان مخذلكمش ويارب دايماً أبقي عند حسن ظنكم وأكون نموذج مشرف للبنت المصرية المجتهدة .

بنشكرك يا هايدي علي الحوار الجميل ده وربنا يوفقك وتحققي كل الي نفسك فيه