أنباء اليوم المصرية في جلسة حوارية خاصة مع الفنان القدير محمد عبدالجواد ومشاركته في مسلسل المداح٢ ” أسطورة الوادي”.

الحوار هو حديث تبادلي بين طرفين لمعرفة معلومات أكثر عن الشخصية المراد التحاور معاها عشان كده المرادي هنتحاور مع ممثل شغل الوسط الفني بأعماله في التسعينات وأدواره المختلفة والمميزة ورجع بقوة للوسط بدوره اللي رغم صغره إلا إنه كان فعال في مسلسل المداح ٢ الذي عُرض في رمضان ٢٠٢٢ بطولة الفنان حمادة هلال ، تأليف أمين جمال ووليد أبو المجد وشريف يسري، وإخراج أحمد سمير فرج.

ممثلنا هو " الفنان محمد عبد الجواد" ، ممثل مصري.
عمل بالمسرح والسينما، ولد في القاهرة، وتخرج من خلال «المعهد العالي للفنون المسرحية»، اشتهر من خلال دوره في فيلم " الطريق إلى إيلات" . له العديد من الأعمال الفنية الناجحة المتنوعة بين مسلسلات وأفلام ومسرحيات مثل

• العراف (2013)
• سلسال الدم (2015)
• ربيع الغضب (2013)
• احنا الطلبة (2011)
• الباطنية (مسلسل) (2009)
• إمام الدعاة (مسلسل) (2003) الابن الثاني للشيخ الشعراوي
• الوتد (مسلسل) (2000)
• أم كلثوم (مسلسل) (1999) .... أحمد بدرخان
• أوراق مصرية (مسلسل)

و فيلمه الذي نال شهرة كبيرة وقتها فيلم "الطريق إلى إيلات"

• الصاغة (1996)
• ولا في النية أبقى (1999)
• الكافير (1999)
• يوم العرض (2019)
• ساحر النساء (2021)

في بداية حوارنا نحب نرحب بفنانا القدير وكل فريق العمل بيتمني لحضرتك دوام الصحة والعافية والنجاح.

_حضرتك فيك تكلمنا عن أحب الأعمال الدرامية لقلبك من الأعمال اللي حضرتك مثلتها ؟

أهلا أستاذة إيمان ، كل سنة وحضرتك طيبة وبخير وسعادة .
حضرتك سألتيني فيك تكلمنا عن أحب الأعمال الدرامية لقلبك؟
بصي هو طبعاً أقسملك بفضل الله أن معظم الأعمال اللي أنا عملتها قريبة جداً من قلبي بس نقدر نقول أن "الطريق إلى إيلات" قريب أوي , وإمام الدعاة قريب جامد ," لدواعي أمنية" مع الأستاذ محمد فاضل برضو قريب أوي من قلبي , وبردو قريب أوي من قلبي مجموعة المسلسلات التاريخية اللي هي عن معظم الأئمة زي الإمام الشافعي وطبعاًالإمام الشعراوي ومعظم الأعمال دي ليها بريق خاص جوايا ومفيش دور بفضل الله الحمد لله الواحد لعبه إلا وكان بيعمله وهو مستمتع , طبعاً مش هقولك كله بس الأغلب يعني .

_ما هي الشخصية اللي الفنان محمد عبدالجواد مثلها كانت تشبه شخصيته الحقيقة تماماً؟

لا أنا ماظنش أني عملت شخصية قريبة أووي مني كدا وبعدين مفيش حاجة اسمها كدا , لأن شخصية محمد عبد الجواد لا يمكن هيبقى زيها حتى في شخص في التمثيل وإلا مش هعرف امثلها ! همثلها أزاي يعني أو اشخصها أزاي ؟ لازم تبقى شخصية فيها سلبيات كتير وبردو فيها أيجابيات فأنتي بتلعبي ما بين السلبية و الإيجابية ..طبعاً محمد عبد الجواد كشخص لازم يبقى برا الحكاية دي , اضافته للحكاية هي أدواته بس ...

_ أثناء تصوير فيلم أو مسلسل لحضرتك ، هل بتجد صعوبة في الموازنة بين الشغل وحياتك الشخصية؟

لا شغلي ملوش علاقة بحياتي الشخصية وبعدين شغلي هو كل حياتي المفروض , حياتي الشخصية دي بتاعتي ملكي , مش كلها لأن أي شخصية عامة بيبقى في جزء كبير جداً منها للناس في السلوك وفي المعاملة , الحمد لله بفضل الله الواحد يعني مبيتأذاش مهما كان اللي جواكي أنتي فاهمة كويس أووي أن الجمهور ملوش ذنب , يعني أنا عندي أزمة أو عندي مشكلة لو جه واحد عايز يتصور, هو ملوش ذنب باللي عندي ، لأن هو ليه اللي في دماغه ميعرفش دماغي أنا فيها أيه ! ومش لازم يعرف , عادي جداً برضو بإبتسامة لطيفة وعادي يعني مفيش مشاكل.

_ما هي الصعوبات اللي حضرتك قابلتها علي مدار مشوارك الفني وماذا كان رد فعلك ؟

أنا عايز أقولك يعني حجم الصعوبات اللي الواحد قابلها كلمة ضخمة قليلة جداً لكن طبعاً بيبقى دائما أن في ربنا سبحانه وتعالى والتوفيق من عنده ، أه في صعوبات طبعاً لازم في المراحل في البدايات كانت فيمسائل كتيرة جداً ممكن تبقى مؤذية نفسياً , لكن مع الوقت ومع الفهم ومع السن خلاص البني أدم بيفهم أشياء أخرى وبيتفهم الأشياء على حقيقتها مش على شكلها ، طبعاً حجم الجد والأجتهاد في الأول , بتبذلي أقصى طاقة عندك وهقولك علي حاجة طبعاً لغاية دلوقتي الحمد لله الواحد مازال ليه ؟ لأن الواحد عايش بروح الهاوي بردوا ما زال بيبذل أقصى طاقة عنده ,الصعوبات موجودة في الحياة هي الحمد لله الحياة كلها صعوبات , صعوبات فنية بقى بشكل خاص طبعاً كان في أيام اللي خدت كتف قانوني واللي وقف ضدك بمنتهى الشراسة وفي أشياء كتيرة جداً يعني من هذا القبيل , عادي جداً أي بني أدم في أي مواقف يقابلها يعني.

_ إيه سبب اختفاء محمد عبدالجواد لفترة عن شاشة التليفزيون ومجال التمثيل؟

لأ أنا مختفتش خالص أنا لغاية 2011 الأمور ماشية مظبوطة جداً إنما بعد ثورة 25 يناير ودخلنا في خضم أحداث كتيرة جداً , الأحداث دي عملت شكل من أشكال الأهتراء للوسط الفني بشكل عام وحصل تغيرات كتييرة جداً , اعتقد أن من الذكاء أنك لما تشوفي الدنيا بيحصل فيها كدا أنك لازم تقفي وقفة كدا تتفرجي وتشوفي الصورة دي شكلها هيبقى عامل أزاي خصوصاً أن الفن أساساً بيخضع لحاجة اسمها الظاهرة والظاهرة دي بتبقى زي الفقاعة تتطلع وتكبر وتكبر وتكبر وبعدين كل سنة وأنتي طيبة تختفي.

_هل كل ما حدث للفن في ثورة يناير وانقطاع ممثلين كتير عن العمل بعد الثورة دا يندرج تحت بند الظاهرة ؟

آه طبعاً حصلت ظواهر كتيرة جداً وحصل أشياء كتيرة جداً لدرجة إن المخرجين الكبار في مصر مكانوش بيشتغلوا واعتقد أن معظمهم ما زالوا مبيشتغلوش ودي تكاد مرعبة وماعون ثقافي كبير جداً غلط أنه لا يستغل , لازم يستغل. .

_لو محمد عبدالجواد هيقدم نصيحة لأي شخص مقبل علي التمثيل هتكون أيه؟

اللي أنا عايز أقوله لأي حد , هقوله قبل ما تفكر في طريق المهنة فكر في متاعب المهنة , لأن لازم تكون بتحب المهنة دي علشان تتحمل صعوباتها , إنما لو أنت معندكش قدرة على أنك تتحمل صعوباتها فمتفكرش من الأول دا واحد , أتنين إذا كنت تمتهن المهنة دي وأنت في بداية مشوارك لازم يكون ...حاول أنك تكبر ماعونك الثقافي ..ليه لأن فنان بلا ثقافة بالظبط كدا كأنه إناء فارغ وللأسف الفراغ دا بيخلي بعض الظواهر تتطلع وتفسد الذوق العام ..ليه؟ لأن الماعون الثقافي فارغ تماماً وطبعاً ثقافي يعني أيه ؟ يعني يبقى عندي علم بما يدور في العالم من حولي, عندي فكرة عن تاريخي وتاريخ بلدي والتاريخ بشكل عام , وقصدت أن أقول الحاجتين دول لأن الناس علطول أول م نقول ماعون ثقافي ...طبعاً دا بالأضافة للي هما بيفهموه اللي هو أنا ابقى عارف توفيق الحكيم , أنيس منصور , وليم شيكسبير , ألبير كامي , يعني كل الشخصيات دي , اه طبعاً كل دا مهم جداً واتمنى أن كل واحد يبقى كدا.

_ من وجهة نظرك ما الذي يفتقده الفن حالياً عن قبل ذلك؟!

إني أشوف مؤلف واحد في العمل ..ليه؟لأن طبعاً في مسائل أحنا بنغفلها , المؤلف هو المبدع الحقيقي للأعمال الفنية, هو دا اللي محطوط في الموسوعة العالمية , المؤلف وما يأتي من بعده من ممثلين ومخرجين وأكسسوار وإضاءة وديكور , كل دا تابع للمؤلف بالفعل ودا المبدع الحقيقي في العملية الفنية , المبدع الحقيقي مينفعش يبقوا اتنين ولا تلاتة لازم يبقى واحد بمنظور واحد بفكر واحد بثقافة واحدة بأيدلوجية واحدة بإتجاه واحد زي ما اتعلمنا وشوفنا أسامة أنور عكاشة وشوفنا مؤلفين كبار , وشوفنا أزاي بيتولد العمل على أيديه وشوفنا ماعونه الثقافي كبير أوي , فالمسألة بالنسبة له مش صعبة , هي بس تجيله فكرة ويشوف هيتكلم عن أيه وبيكتب , إنما نقعد ورشة وكل واحد ليه فكره وكل واحد ليه توجه وكل واحد ليه اتجاه ونحاول نجمع بعد كدا في الأخر الإتجاهات دي كلها مع بعض , مسألة صعبة إلا إذا كان الجروب الموجود دا يعني اتنين أو تلاتة زي بعض بالظبط وأنا مأظنش أن في اتنين أو تلاتة زي بعض بالظبط على أي
مستوى من المستويات يعني ...دي أمنية قد تتحقق وقد لا يعني محسن زايد كان بيقعد يألف الله يرحمه كان عبقري وأسامة أنور عكاشة نفس الشىء لذلك المواضيع كانت بتبقى قوية جدا , نفسي ألاقي موضوعات قوية جداً وموضوعات تخدم المجتمع مش تفسد الذوق للمجتمع , نفسي الألفاظ اللي بتطلع كتير أووي بقى , بنسمعها اليومين دول شخصية زبالة وشخصية وسخة , أيه الألفاظ دي يا جماعة , أحنا بنعدم ذوق المتلقي , أحنا بننزل وناخده وننزل بيه , هي دي وظيفة الفن للرقي مش انحلال واضمحلال .

_ دورك في مسلسل المداح ٢ " أسطورة الوادي" واللي جسدت فيه شخصية" الحج عباس" ، رجل مُسخر من قبل الجن لتحريض حسن " الفنان خالد سرحان " لدخول في عالم السحر ، ما رأيك في الدور وهل كان مُرضي بالنسبة لحضرتك" ؟

دوري في مسلسل المداح , مسلسل المداح دايماً هنتفق على شيىء مهم جداً أن مفيش حاجة اسمها دور صغير ودور كبير , في حاجة اسمها ممثل صغير وممثل كبير , يعني أنا اتذكر مثلا أني ف" ضمير أبلة حكمت" أنا كنت عامل دور في خمس حلقات وكان المسلسل ١٥ حلقة لكن الدور دا مثلاً أنا عايز أقولك صداه بالنسبالي كان أكتر ورد فعله بالنسة ليا كان فوق الوصف ووصفه فوق الخيال وعلفكرة بردوا دا من المسلسلات اللي بعتز بيها جداً وخصوصاً أعتزازي الشديد بالعظيمة الراحلة فاتن حمامة , فنانة تمتلىء بالصدق والأمانة والحيوية مكنش دور ضخم ومكنش دور كبير لكن عايز أقولك صداه كان أكتر من مرعب يعني أقولك على حاجة تقريباً خمسة وتسعين في المية من شركات الأنتاج في مصر أيامها كلموني بسمعظمهم كانوا عايزيني أعمل تقريباً نفس الدور فأنا للأسف مقدرش اعمله تاني يعني صعب ,غلط مش مش مظبوط يعني دي حاجة , الحاجة التانية لو تتفرجي ع المسلسل هتلاقي أن الشخصيات تقريباً كلها متوازية يعني مفيش المطلق , أنا لما قريت حسيت أن مفيش المطلق وحسيت أن البطل الحقيقي هو الورق دا واحد , اتنين الشركة المنتجة شركة جميلة وتجنن , تلاتة الكاست المعمول كاست رائع جداً بالعكس دا في منتهى الروعة ودايماً لما تبقي في وسط كاست كويس تأكدي أنك هتنوري , طبعاً الأستاذ العبقري أحمد سمير فرج مخرج من جيل الشباب الواعد اللي يجنن اللي هو بيجمع ما بين الشباب اللي هو ما بين الحاضر والماضي .. ليه ! لأن برضو اشتغل في وسط الأجيال القديمة واتمرمط شغل وبالتالي ناضج أخراجياً وبقى يعني مش عايز أقولك أنه عبقري وأكتر من عبقري طبعاً في ظل الخطاب دا كله , تلاقي دور مختلف ومختلف تماماً وهتتناوليه منين وهتخشي للشخصية دي منين وهتخدعي المتفرج الأول أزاي إنه إنسان عادي وطبيعي وبعدين في الآخر خالص أنتي مش هتعرفي إذا كان ملبوس من الجن ولا هو نفسه جن لغاية اللحظة دي أنتي مش عارفة ومنعرفش إن كان الجزء التالت لو كان في تالت بقى لأن القفلة بتقول إن إحنا مستمرين , راحت مليكة لسه في أتنين عتاولة قاعدين يعني ..فخير مفيش حاجة اسمها الدور صغير , الدور مكانش صغير خالص بالعكس الدور أنا تقريباً
فاكر عدد مشاهده أد أيه ولا حلقاته أد أيه بس بتاع أربعة وعشرين حلقة تقريباً , عدد مشاهده لو تشوف الحلقة هتلاقي كل ممثل بيطلع في الحلقة مشهد أو مشهدين بالكتير , الدور حلو جداً أنابعتز بيه جداً ورد فعله بالنسبالي جماهيرياً و فنياً أكتر من رائع واللي كان أكتر من رائع.

_ بما إن المسلسل كان فيه فنانين من زمنك الجميل زي الفنان أحمد عبدالعزيز والفنان كمال أبو رية ، دا بعث شعور إيه عند حضرتك ؟ وهل كان الإجتماع بالشخصيات دي ليه أثر شخصي أو روحي عند حضرتك بخلاف الأثر الفني ؟

لقيت أحمد عبدالعزيز وكمال أبو رية حبيب قلبي بعيد عن أيديا كتير لييه؟ لأن هو في مرسى علم وأنا هنا ف في القاهرة يعني أو في الفيوم فلم نلتقي على الأطلاق إنما طبعاً وأنا بشوفه ع الشاشة بسلم عليه , اللي ونسني بقى وكان معايا حبيب قلبيأخويا كمالل أبو رية وطبعاً لحُسن الحظ كان بيجمعنا عمل آخر تم أذاعته على أحدى المنصات الغير مصرية واتشاف المسلسل واجتمعت أنا وهو وكنا عاملين كابل يجنن لأن أحنا الأتنين طالعين ولاد عم صعايدة يعني فسعادتي بيه طبعاً كانت فوق الوصف وفوق الخيال يعني , ليه ؟ لأن طبعاً مفيش حواجز , التفاهم موجود والصدق موجود والعشرة موجودة , وكل ما بتلاقي حدأنتي برضو عاشرتيه وونستيه وتونستي بيه في بعض الأعمال أو في أعمال كتيرة أووي سابقة يعني طبعاً بتبقى مليانة سعادة وحديث الذكريات بقى

_ما الذي ينتظره الجمهور من ممثلنا القدير الفترات المقبلة ؟

بإذنك يا رب في مسلسل أنا خلصته وكان المفروض أنه يذاع في رمضان بطولة رانيا يوسف اسمه" عالم تاني" أخراج الأستاذ عبدالعزيز حشاد , للأسف يعني حصل في تعسر وهيعرض في شهر ٧ وبردو أنا عامل فيه حاجة كويسة ما يعني عامل دور جنائي فيه , وفي مسلسل اسمه مزاج الشر دا إخراج الأستاذ ممدوح ذكي دا لسه مخدش حقه في العرض يعني , دول خلصوا بالنسبالي والمفروض أنه عالم تاني هيتعرض في شهر سابعة بأذنك يا رب أن شاء الله , اللي
جاي بعد كدا بعد رمضان في كلام , في كلام كتير أووي بس أنا مقدرش اديكي أي حاجة عنه دلوقتي أو اي تفاصيل إنما أنا أأمل أنه يكون خير أن شاء الله وفي مسلسل مع مصطفى قمر بإذنك يا رب إن شاء الله الأيام اللي جاية , ربنا يسهل ونبتدي فيه.

_ما وراء الستار ، إيه أهم التصريحات اللي حضرتك حابب تبينها للجمهور من خلال أنباء اليوم المصرية؟

خبر حصري أن بإذنك أستاذ محمد فاضل , والأستاذ جمال عبد الحميد , الأستاذ مجدي أبو عميرة , بإذنك يا رب الموسم اللي جاي هتلاقيلهم أعمال أن شاء الله , وخدي الخبر دا على مسئوليتي أنا.

_ حضرتك حابب تضيف أي شئ في نهاية حوارنا أو توجه كلمة لحد؟

في النهاية أنا بشكرك وأرجو أن أنا اكون جاوبتك على كل أسئلتك .
وفرصة سعيدة جداً

الإرادة هي ما يدفعك للخطوة الأولى على طريق الكفاح، أما العزيمة والتحدي فهما ما يبقيك على هذا الطريق حتى النهاية.

في ختام حواري أتقدم بخالص الشكر القدير للفنان القدير محمد عبدالجواد علي هذا الحوار الممتع وكل فريق العمل من روؤساء ومحررين وأعضاء يتقدمون بخالص النجاح والتوفيق لحضرتك.